رباعيات و آهات الهمامى

موضوع: رباعيات و آهات الهمامى 3/17/2010, 14:52

رباعيات و آهات الهمامى

من رباعيات الشاعر احمد الهمامى
حرية الرأى مكفولة من زمان فى كل كتاب ودين
والأمر شورى مــن أيـــــام محمد آخر المرسلين
يعنى أنا أتشجع و أقول كل اللى جوايــا ولا أخــاف
من المحاضر والقضـايا والحبس ويـــا المجرمين
وآه
أنا المــــــصري الأصيـــل كريم العنصـــــــرين
وجــــــدي كان ميـــنا موحد القطــــــــــــــــرين
ماكنش مسلم ولا كان مسـيحي ده كان فرعون
يعنــــي الأرض دي ملـــك لجــــميع المؤمــنين
وآه

فيه ناس تقول نعيش في الدنيا يسر
وناس تقول نعيش نموت هي عسر
ولا حد قال أبدًا إنهـــــا بين الــبنين
يسر مع عسر ورابط ما بينهم جسر
وآه

وحيـد وعــــايش بلا أهـــل و بلا خــــــــــلان
وكل يـــــــوم بيــــــمر بتزيـــــــدي يا أحــزان
أنا هــعمل إيه وإيـــــــــــه قصــادي أعــملـه
غير إنـي أدعـــي ربنا يصبرني كمان وكمان
وآه

اعمل حســــــابك يا ابني بكـــره جاي
والله أعلـــــــــم هبقي ميــــت ولا حي
وإن كنت فاكرني هدوملك تبقى واهـم
الله يعيــــــنك عالحياه وماتقولـــش أي
وآه

أنا قــــــلت آه لما رأيتـــــــــــــك يا جــــــدع
ليه إيديا مش لاقيه إيد تتــمد ليــــــــــــــها
ليه عينيا مش شايفه عـــين تحــــــس بيها
مع إني فوق الأرض ووسط البشر موجود
ولا أنا اندفنــــــت ومش عايـــش لسه فيها
وآه

ورق بــــــرق خــرق شرق ســرق
مالك يا حــــرف القاف عامـل قلق
لازم تغيـــر اسمــــــك نطقك تقيـــل
ريحني أحسن هاقتلك وأقول غرق
وآه
سباح وكــان بيحب ينـزل في الغــــريق
وف ليله سودا البحر هـاج بلـع البريء
يا هــــل تـــــــــــرى مــــــات م الغــرق
ولا لأنــــــــــه ماكنــــش معــاه صــديق
وآه
افرح يا بابا ابنك خــــد شهــــــاده
ليسانس عالي وجايبه بالإجـــــاده
بروزه أو شـــوف هتعمل بيه إيــه
أما أنا فهشرب قهـــــــــــوه سـاده
وآه

نوح النبي عاش في الأرض ييجي 1000 عام
وكــــل يوم يــدعو البشر آمن به كـــــــــــــــام؟!
واحــد ...عشرة... ألــــــــــف.... مليون ... بس
قام خد سفينته بالمؤمنين وفـــــــي البحر هــــام
وآه
طبيـب نفساني رحت أسأله مالي
شـخصـني قال عندك فصام عالي
رديـــت وقلت إيه العـمل يا طبيب
وكانت إجابته حالتك هي حـــالي
وآه

الله عليـــك يابـــــــــــــــن الزمـــــــــن ده
عايش لنفسك وبــــــــطريقتك بالمعـــانده
ولا بتكسب ولا بتخـــــسر وخطـوتك عَنْدَه
أنا دعيتلك ربنا وقلـت يا رب اسنده سَنْدَه
وآه
غلبان وكحيان وبالضالين باكل عيش ومش
وأخويا زهقان من العز وبِيـــــــلُغ مِش مِش
مع إننا مـــن بـطن واحــــده وتـــــــــــوأمـين
لكن سبحانه بيطعم اللي يِسوَى واللـــي مِش
وآه

أسلوب حياتي هترفضـــه أو تقبله أنـــــت حــرّ
أنا طفل شـارع وغصب عنـــي أبتــــليت بالمــرّ
يتيم .. فقير .. مريض .. ما تقولش وأنا مــــالي
عندي أمل تساعدني مع إني لا هنفعك ولا أضرّ
وآه

ولــدي تعالى هــقولك كلـــمتين
وصـــدقني يابــني يانني العــين
لـــــو خــدت بيهم لازم هتكسب
إيـــــاك تـــزعل والديـك الاتنين
وآه